【剪不斷 理還亂】

星期六下午,是休假日。突然間,收到邨內兩位相熟街坊的Whatsapp短訊。

短訊(1)

街坊A:「我一家做咗快速測試,2條線,中咗招。」

我問:「幫你哋聯絡衛生署?」

她答:「阿邦,唔洗啦,聯絡咗都無用,盞得個煩字。政府都支援唔到我哋,又唔會送到物資過嚟,又唔會收我哋入院……咁搞嚟做乜?我哋自己食藥算了!」

她繼續說:「我有個親戚確診咗,做緊家居隔離,等緊送入醫院,佢打咗百幾次電話終於成功打到上去衛生署問:『我確診,做緊家居隔離,但政府無理我,無人送野俾我,我啲野食曬啦,我點算好?又無朋友敢幫手……』」

衛生署的職員回覆:「咁無法啦,你戴多個口罩落去買啦。」

短訊(2)

街坊B:「我2條線,中咗。」

我:「吓……咁大獲……」

她說:「我出咗去南葵涌想睇醫生,佢哋話我無預約,叫我番屋企約咗先好嚟,但我打咗幾百次電話都無位。」

她繼續道:「慘啦,私家醫生唔睇我,南葵涌呢啲指定診所又約唔到,公司要我俾病假紙,先會當我係病假出糧,否則就當係無薪假。邦,你話點算好?」

從以上兩個個案可以看到,疫情期間社會的混亂及街坊的無助。其實,在抗疫的大前提下,理應上下一心,不分彼此。在現時嚴重欠缺人手之際,必須積極尋找更多可動員的人力資源,建議如下:

1) 政府
應作好規劃及準備,調動更多資源及分配足夠人手支援在家隔離者,照顧有關家庭或人士的生活物資及醫療藥物需要。

2) 公務員
取消公務員在家工作的安排,調撥更多負責非緊急服務的公僕去增援。

3) 網購平台
宣傳及教導大眾使用網上購物平台,居家隔離的街坊可透過手機落單,並安排在無接觸下送貨上門。政府亦可提供補貼予商界,以確保網上貨品的定價不會高於實體貨品。

4) 視像診症
提供免費視像診症服務,若只出現輕症病徵,可透過網上問診,並獲簽發病假紙;如需要藥物,可安排在無接觸下送藥上門。

山不轉路轉,辦法總比困難多。因時制宜,才是解決問題之道。

Share this post